வேறு பட்ட கண்ணோட்டம்

ஒரு ஏழை மனிதன் தன்னுடைய குடும்பத்தினருக்காக, கடினமான முயற்சி எடுத்து ஒரு வீட்டைக் கட்டினான். ஒவ்வொரு ரூபாயாக சிறுகச் சிறுக சேர்த்து, 20 வருடங்களுக்குப் பிறகு வீட்டைக் கட்டி முடிக்கிறான். எனவே, அவரது குடும்பம் அந்த குடிசையில் இருந்து வெளியேறி பெரிய வீட்டில் குடியேறி மகிழ்ச்சியாக இருக்கப் போகிறார்கள்.     

   இறுதியாக ஒரு நாள் அந்த வீடு கட்டி முடிக்கப்பட்டு தயார் ஆனது. எல்லோரும் சேர்ந்து ஆலோசித்து, ஒரு விஷேசமான நாளை, புதுமனை புகுவிழாவிற்காக முடிவு செய்தார்கள்.    

   ஆனால், விழாவுக்கு 2 நாட்களுக்கும் முன்னால், ஏற்பட்ட நில நடுக்கத்தால், அந்த வீடு முழுவதுமாக இடிந்து விழுந்து போய் விட்டது.    

   இந்த சம்பவத்தைப் பற்றி தெரிந்தவுடன், அந்த ஏழை மனிதர் மார்க்கெட்டுக்கு ஓடிச் சென்று இனிப்புகள் வாங்கி வந்தார். வீடு இடிந்து கிடந்த இடத்திற்கு இனிப்புகளோடு சென்றார். அங்கு நிறைய பேர் திரண்டு நின்று, அவர்களது வருத்தத்தை வெளிப்படுத்திக் கொண்டு நின்றனர். இந்த சம்பவம் நடந்ததற்கு இரங்கல் தெரிவித்துக் கொண்டிருந்தார்கள்.     

  “ஓ, இந்த ஏழை மனிதருக்கு இப்படி ஒரு துரதிர்ஷ்டமான செயல் நடந்து விட்டதே? மிகவும் கஷ்டப்பட்டு ஒவ்வொரு ரூபாயாக சேர்த்து அல்லவா இந்த வீட்டைக் கட்டி இருக்கிறார்!    

  மக்கள் தங்களுக்குள் வித்தியாசமான கருத்தை விவாதித்துக் கொண்டிருந்தார்கள்.    

  அந்த ஏழை மனிதர் அங்கு வந்தார். தனது பையில் இருந்து, இனிப்புகளை எடுத்து எல்லோருக்கும் கொடுக்க ஆரம்பித்தார்.    

  இவரது இந்த செயலைப் பார்த்து அனைவரும் ஆச்சரியம் அடைந்தனர்!   

   முடிவாக, அவரது நண்பர்களில் ஒருவர் அவரிடம் கேட்டார், “ உனக்கு பைத்தியம் ஏதும் பிடித்து விட்டதா? உன்னுடைய வீடு முழுவதுமாக இடிந்து போய் விட்டது; உன்னுடைய வாழ்நாள் முழுவதுமாக நீ சம்பாதித்த வருமானமும் அப்படியே வீணாகப் போய் விட்டது. ஆனால், நீயோ மகிழ்ச்சியாக இனிப்புகளை கொடுத்துக் கொண்டு இருக்கிறாயே!?” 

   அந்த மனிதர் புன்முறுவலோடு பதில் அளித்தார் ,” நீங்கள் இந்த நிகழ்ச்சியின் எதிர்மறைப் பக்கத்தினை மட்டுமே பார்த்துக் கொண்டு இருக்கிறீர்கள். நேர்மறைப் பக்கத்தை அல்ல. இந்த வீடு இன்றே இடிந்து விழுந்தது நல்லதுதான். இப்படி இல்லாமல், வேறு மாதிரி எண்ணிப் பாருங்கள் –இந்த வீடு இன்னும் இரண்டு நாட்களுக்குப் பிறகு இடிந்து விழுந்தால், முழு குடும்பமும் அதாவது நான், எனது மனைவி, குழந்தைகள் அனைவருமே அல்லவா இறந்து இருப்போம். அது எவ்வளவு பெரிய இழப்பு ?

  எந்த நிகழ்ச்சியோ, அல்லது விஷயமோ அவற்றிற்கு இரண்டு பக்கங்கள் உண்டு –நேர்மறை அம்சமும், எதிர்மறை அம்சமும். அதை நாம் எப்படிப் பார்க்க விரும்புகிறோமோ அதைப் பொறுத்து, அது நம்மை சார்ந்து இருக்கிறது. நமது வாழ்க்கையின் விதியும் அதைப் பொறுத்துதான் அமைகிறது.